قريشلات عاشوراء مقرمشين وهشاش بمقادير مضبوطة

قريشلات عاشوراء مقرمشين وهشاش بمقادير مضبوطة

كيجيو مقرمشين وهشاش، والبنة ديال الزنجلان والنافع كتفكرني فقريشلات الدار ديال زمان، خصوصًا مع أتاي.

المقادير:

125 غ زبدة بحرارة المطبخ، والأفضل تكون نوعية مزيانة
3 بيضات
كأس وربع سكر
كأس زيت
كأس ماء
2 ساشي سكر بنكهة زهرة البرتقال، وإلا كان روح ماء الزهر يكون أحسن
1 ساشي خميرة الحلويات 7 غ
كأس إلا ربع زنجلان محمص
3 ملاعق كبار نافع حبوب محمر شوية ومطحون
قبصة ملح
الدقيق حسب الخليط، تقريبًا من كيلو حتى كيلو و100 غ، المهم العجين يبقى رطب وما يكونش قاصح

الطريقة:

كنخلطو العناصر كاملة مع بعضياتها، ونزيدو الدقيق بشوية بشوية حتى نحصلو على عجين رطب ومرخوف شوية. كنخليوه يرتاح ربع ساعة.

من بعد كنشكلو حرابل رقاق، ونفرشو طاوة الفرن بورق الزبدة أو ندهنوها بشوية زيت. كنقطعو الحرابل بالمقص بشكل مائل، ونرتبوهم فالطاوة، ومن الأحسن نضغطو عليهم شوية براحة اليد باش ملي ينتفخو يبقاو محافظين على شكلهم.

كندخلوهم لفران سخون على 180 درجة، النار من الفوق والتحت، حتى ياخذو لون ذهبي زوين.

كيخرجو قريشلات مقرمشين وهشاش، ومقاديرهم بسيطة غير خاصهم شوية ديال الصبر.

واش حتى نتوما كتوجدو قريشلات عاشوراء فالليل هربًا من السخونية ولا كتخليوها حتى يبرد الجو؟